الأحد، 29 مارس، 2015

الولاد شايفين البنات ازاى؟


- عزيزتى البنت : لما واحد يقولك انه بيحبك يبقى فعلا بيحبك ومش كل مرة لازم يأكدلك المعلومة... هوا قالها مرة وخلاص
- مش لازم تروحى تقابلى حبيبك مثلا وانتى حاطة تورته فواكه ف وشك ومانيكير ف ايدك وتستنى انه يقولك واو ... هوا اصلا مش بياخد باله م المهرجان ده ، شم هياخد باله من لون الباليرينا ولا شكل الشنطة ولا بقية الحاجات اللي إنتي بتحطيها الي هوا اصلا ميعرفش اسمها.. مش لازم كل مرة تقعدى ساعتين تفتكسى ف لوك جديد ... هوا واخد عليكى كدة ومعجب بشكلك ... بلاش الافورة
- اكيد حبيبك مش مخترع الذرة عشان كل يوم تساليه ع تفاصيل يومه ... بلاش عملت ايه النهاردة كان يومك عامل ازاى ..لانه هيقولك تمام...هوا اصلا مش هايقولك هوا بيعمل ايه ولا عايز يعرف انتى كمان عملتى ايه
- ماتستنيش منه يفتح المندل ويعرف انتى زعلانة منه ف ايه ... زعلانة اتفضلى انطقى ... وبلاش تغيرى طريقتك معاه ويفضل يسالك ويقولك مالك تقولى مافيش ...لانه وبدون اى مقدمات هيقولك غورى او اتفلقى.
- مش معنى إنه ويتنج إنه بيخونك.. عادي هو ممكن يتكلم في الموبايل عادي...بلاش الخنقة
- في الأغلب إنتي مرتبطيش مرة واحدة في حياتك .. وبرده مش أقصى حاجة قليلة الادب عملتيها إن في ولد باس إيدك.. قولى الحقيقة..إحنا فى مجتمع منحل...وكلنا عارفين اننا ف مجتمع منحل
- مينفعش تزعلي لو سابك تخرجي مع أصحابك وتقولي إنه مش بيغير عليكى.. ومينفعش تزعلي برده لو قالك لا متخرجيش "مع ناس معينين" علشان هبيقى بيحبسك وبيتحكم فيكي...ممكن يكون مش بيرتاح لناس معينة او خايف عليكى منهم
- ياريت ما تعمليليش مينشن في صورة بتاعت واحد شايل واحدة...او فيديو رقصة البطريق وتقوليله هنبقى نعمل كده ..ف كل الاحوال هاتحسسيه انه مقصر معاكى
- الشيكولاتة والورد والمراجيح..أكيد مش دي أكتر حاجات بتفرحك... فبلاش تمثيل...الولد عارف انك مش كائن هينقرض من كتر الرقة
- لازم تبقي عارفة إنك بتكلفييه وقت وفلوس وصحة ، وتاكسى رايح وتاكسى جاى فأكيد هوا مش بيتسلى بيكي.
- مش معنى انه مش بيرغى كتير معاكى يبقى مش بيحبك ... الولاد بيحبوا الاختصار .. بلاش الرغى ونظام خالتى اللتاتة ده..هما بيفهموا الكلام بطريقة " خير الكلام ما قل ودل" ...عايزة تديله معلومة ..ادخل ف الصميم وبلاش التاتشات بتاعه البنات دى ابوس اديكى.
- بلاش حكاية نام بدرى يابيبى ... فطرت ولا نسيت نفسك ؟ اتغطى كويس ... بلاش تخفف ..ساعتها كدة هتتحولى صورة من امه..والاغلب انه هيشوفك امه
- بلاش وحياة ابوكى ياشيخة تاخديه معاكى وانتى نازلة تشترى بلوزه او حتى تعملى شوبينج ..هوا مش هيستحمل انك تدخلى محل فيه 300 الف بلوزة وف الاخر تقوليله مافيش حاجة عاجبانى..رده الطبيعى هيكون " طب هيعجبك امتى" او " هيعجبك ايه " او هنلاقى فين ؟
- مش لازم تقولى انك عارفة ان احمد بيحبك ...طنشى .... هوا كمان عارف ان سوزى بتموت فيه ومطنشها ... عادى يعنى
- واكيد برضه مش هيهتم إن شيماء بتغير منك، أو أسماء بتكرهك، أو إن لمياء بتحقد عليكى.. بالنسبة ليه ده كلام فارغ وحوارات حريم ومش هيركز فيها.
- ساعات حبيبك هيبقى مش طايقك ومش عاوز يشوفك.. عادي هوا ساعات ببقى مش طايق أمه..بس ده مش معناه انه مش بيحبها...اديه شويه حريه يافوزية :D
- لما يقولك هاتى خط فودافون عشان اعرف اكلمك ... اعرفى انه مهتم او عامل باقة ... لو قالك غيرى خطك اديله بالجزمة :)
- متقفليش موبايلك؛ علشان ميطلعش عينك وعين اللي جابك. - بصي هما الموضوع عندهم زي لغة الكومبيوتر..او زى قانون الكيميا اللى اخدناه ف المدرسة " لكل فعل رد فعل مساو له ف الشدة" حاولى تحبيه بطريقته... وبرضه حاولى تخلى الحياة حلوة
- قوليله كلام حلو هوا بيحب يسمعه
- واخيرا ياريت ننام بدرى ونوفر رصيد بعض.

الثلاثاء، 16 يوليو، 2013


عوايدنا
فيه عادات وتقاليد ف حياتنا اتولدنا لاقيناها وعايشين بيها بس فى الحقيقة احنا قافشين عليها ... مسخرة.
ومن المساخر دى سن الجواز اللى ياحرام لو جارتك او صاحبه مامتك جت عندكوا ف البيت وخبطتك السؤال الشهير "انتى عندك كام سنه " ولما تردى عليها من واجب الذوق والادب طبعا وتقولك " ولسه ماتجوزتيش؟" او "ربنا يطمنا عليكى" طبعا الكلام مافيهوش حاجة وجميل جدا من الجوهر بس ..بس هوا اصلا يفقع المرارة ويخليكى تضربى نفسك مليون جزمة او اى حاجة قدامك وياسلام لو كانت سكينة O-o وده كله عشان عبرتيها اصلا !! الكلام اللى فات لو انتى بنت بس لو انت ولد بئى الموضوع بياخد ابعاد تانية خاااالص ابسط بُعد فيها انك يا شايفلك شوفة يا بتعُط عط السنين ;)
عارفين كل دا كوم و ان الطعنة تيجى من اقرب الناس ليك دا كوم تانى ، الأم والأب ؛مامتك حاطة ف اعتبارها انك ياحرام متاخرة ف الجواز عشان عديتى 23 او 24 سنة ومفيش جواز ده عشان لما اتجوزت من حوالى ربع قرن كان عندها 20 سنة بالكتير اوى وباباكى هيموت من القلق وعايز يفرح بيكى وده من حقهم طبعا بس محدش فيهم او ف غيرهم حاطط ف اعتباره ان الزمن اتغير وسن الجواز اتاخر و ان طريقة الجواز اصلا اتغيرت!!
زمان الجواز كان ف منتهى السهولة وده لان الناس كانت بتجوز جواز قرايب "الواد لبنت عمه " يا جواز معارف " محمد يتجوز بنت الجيران" اللى طالعين نازلين مع بعض واللى نعرفه احسن من اللى منعرفوش
لكن دلوقتى مع تعقيد الحياة كل حاجة اتغيرت بما فيها طرق الجواز دلوقتى بقى الولد او البنت لازم يحطوا بعض تحت اختبارات ديناميكية ولوغارتيمات صعبة عشان البنت تتاكد ان الولد بيحبها او الولد يتاكد من اخلاق البنت وطبعا تيجى المشكلة القاتلة بعد كدة ان الام او الاب ممكن يرفضوا الجوازة لاى سبب واللى غالبا بيبقى مش مقنع ويفقع المرارة زى " انا اللى لازم اختار العروسة" طب وانا ايه يعنى ؟ رجل كرسى مثلا ؟
وهوب تلاقى الام اتحولت لخاطبة ومنظار ف نفس ذات الوقت وتقعد تدور وتتفحص وتتمحص ف البنات او الولاد اللى حواليها
ياحاجة ده لو انتى اخترتى ولا مؤاخذة (شراب) ابنك او بنتك هيلبسوه وهما متضايقين ونسيتى انهم بقالهم اكتر من 8 او 9 سنين بينزلوا يشتروا حاجاتهم وهدومهم لوحدهم وعشان ابنك او بنتك بقوا عبارة عن "شحط كبير" وعندهم ذوق ووجهة نظر فما بالك بقى بالعروسة اللى انتى اختريتها وقال ايه عايزاه يوافق عليها بالصلاة ع النبى ومش عشان "هيا عروسة وزى القمر وم العيلة ونقاوة ايدى " يبقى لازم يوافق عليها وعشان بأختصار "هيا دى الانسانه او الخلقة اللى هيعيش باقى عمره معاها " ده لو ربنا اداله الصحه يعنى .
الجواز بيتقلب من رغبة لفرض يعنى انا كبرت يبقى لازم اتجوز ومش عارفة مين صاحب جارنا بيدور على عروسة فيجى بيص ويتفرج ولازم انا اكون حلوة ومطيعة ف القعدة ده غير التحضيرات اللى الوالدة بتعملها معايا يعنى اقعدى كدة واتكلمى بالطريقة الفلانية وابتسمى ابتسامة رقيقة ولو سالك عن الشغل تكون الاجابة " طبعا هسيبه" ولازم اسمع الكلام وانفذه :D مش قولتلكو من الاول مسخرة
بنات كتير جدا اتحطت تحت ضغوط بسبب حاجات زى كدة ومش بنات بس لا رجالة كمان ومنهم ناس انا اعرفهم وطبعا هما عارفين نفسهم كويس .
للاسف الكلام ده كله بيحصل ف كل بيت مصرى ، سيبوكوا منهم بدل ما تلاقوا نفسكم راجعين بعد شهرين تلاتة منورين جنب امكم عشان نتجوز بدرى سنتين تلاتة اختاروا صح من غير استعجال و ضغوط عشان خاطر ترتاحوا على الاقل الكام السنة اللى بعد الجواز واخيرا ده جواز ياردالة مش فستان ف فاترينة xDواتمسوا بالخير 


الأربعاء، 15 أغسطس، 2012


الصداقة وفوائدها

طبعا بما ان اللى يعيش ياما يشوف بس والله التعليم ده مش ببلاش ابدا وبما اننا مانقدرش نعيش لوحدنا ف الدنيا دى ؟؟؟ف ممكن نختار اصحاب او نقع ف طريقة ناس غلط ونبقى فاكرينهم اصحابنا ...

بس والله العظيم صاحبك الحقيقى هوا اللى تلاقيه جنبك وقت محنتك وبرضه هوا اللى يصارحك بكل حاجة بمعنى اصح هوا اللى يبكيك ولا يضحك الناس عليك ...

الناس كلها بقت تمثل على بعضها ومحدش بقى عايش على طبيعته لدرجة انك ممكن تحس بالنقيض ف شخص واحد وهوا واقف قدامك ..يضحك فى وشك ويمشى من جنبك يتكلم عليك والله حصلت معايا واحدة ف الشغل اتكلمت عليا وكانت عايزة توحش صورتى قدام الناس وبعدها بخمس دقايق بالظبط جت تعزم عليا بحلويات هيا كانت جايباها ...بس عرفت ف الاخر ان الناس ف الشغل كلهم شتموا عليها ...

طيب بلاش كدة مرة دخلت للمدير واشتكت منى وانا واقفة لدرجة انه قاللها هوا انتى بتأسفنيها قالتله اه ...ياريتك مارديتى كنتى حافظتى ع سلام ربنا اللى بيننا

مشكلتى انى بفرض حسن النية ف الواحد لاقصى الحدود الى ان يثبت العكس بس الكلام ده طلع غلط 100% ومابقاش فلى حاجة اسمها صداقة لا ف الشغل ولا حتى الكلية والحقد شغال عمال على بطال والله كان نفسى الدنيا ماتبقاش كئيبة كدة بس هيا فعلا غابة والله العظيم غابة ...

الغابة دى بقى على طول ظلمة ووحشة وكلها حارات سد وكل ما تقوم من نقرة تقع ف ضحضيرة انا عارفة انى بقيت كئيبة اوى بس بجد ده كله من كتر اللى ان شوفته ..حتى لو حبيت حد مش بيبقى شافك ولا مهتم بوجودك زى ماهوا شايف نفسه ..ده يمكن كمان يكون بيحبط فيك عشان يظهر هوا ويبان قدام الناس وانت ظز فيك مليون الف مرة هوا انت تخصه اصلا ؟؟؟

بعد كل الكلام والهرى اللى فات ده احب اقوللكم انا قبل ما اتعلم الكلام ده كله كنت عامله ازاى ؟؟؟

انا باختصار كدة كنت فاكره ان الدنيا دى جميله اوى ولازم تتعاش ...لدرجة ان لو حد جيه وقاللى تعالى نتمشى على شط البحر ونلعب مع السمك كنت هروح معاه عشان الاعب السمك وعمرى ماهحط ف بالى انه عايز يودينى ف 60 الف داهيه ..ومش هيبص وراه بعد ما يتاكد انه خلص عليا ويمشى وهوا مرتاح وراضى عن نفسه ...

ولو حد قاللى انا الدنيا بتمطر دهب مش بتمطر طين كنت هصدق برضه ....

الخلاصه بقى بعد كل الكلام اللى فات ده اتحداكوا لو عرفتوا مين اللى قتل القتيل ومين اللى مشى ف جنازته ...

الخميس، 15 مارس، 2012

ثورة الكيك

ثورة الكيك

بدايتى مع الكيك كانت غريبة شوية واول الحكاية كانت ف المدرسة سنة ثانية ابتدائى والمدرسة بتاعتى كانت طالبة مننا كل واحد يكتب قايمة الفطار والغدا والعشا على مدار الاسبوع كله والكلام ده كان تقريبا اول اسبوع ف الدراسة

بصراحة انا كنت بتخنق من الواجب كله ولما كنت بتأخر فيه كنت بخلى ابن خالتى يساعدنى فيه لما ييجى عندنا يوم الخميس والجمعة

عامة انا لما رجعت البيت قلت لماما المدرسة طالبة مننا نعمل واجب ووريتها الكشكول بتاعى الى كان 60 ورقة وطبعا كان ضخم جدا بالنسبة ليا ازاى بنت ف تانية ابتائى تشيل كشكول 60 ورقة وطبعا كانت شنطة المدرسة تقيلة جدا

المهم وريت لما الكشكول وقولتلها بصى ياماما ده الواجب بتاعى بصت ف الكشكول وقالتلى حاضر هانعمله دلوقتى وجابت ورقة فلوسكاب كبيرة وقالتلى انا هاكتب الواجب وانتى ابقى انقليه ورايا ف كشكول المدرسة .

المهم كتبت الورقة وبعدين اديتهالى وقالتلى انقليها يلا عشان تخلصى المهم ببص ف الورقة لاقيت الفطار بتاع يوم الثلاثاء لاقيته (كيك )اصلا انا ماكنتش عارفة اقراها ورجعت لماما قولتلها ايه دى قالتلى كيك روحت ساكته وكتبتها ف الكشكول زى ماهيا ودى كانت بدايه الكيك معايا .

لما سافرنا تنزانيا ماما بقت تعمل كيك كل يوم كل يوم وبصراحة انا زهقت كل يوك كيك كدة كيك وشاى بلبن وهيا كانت فاضية كل يوم كيك وساى بلبن بص انا بقى كنت ماسكة نفسى وماكنتش بقول انى زهقت من الكيك بس تقريبا كدة والله اعلم هيا كمان كانت اتخنقت وقامت غيرت الكيك بقى بدل ماهوا كيك سادة بقى كيك بالشكولاته طبعا كل يوم واحنا ورنا ايه ...

وف يوم كدة قررت انى اكلمها واقوللها انى زهقت من الكيك ده وبرضه كالعادة ماكنتش بنطق وبعدين قولت خلاص بقى مش مهم

وف يوم وانا نايمة بالليل حلمت ان ف كيكه كبيييييرة جدا وانا بعوم فيها وبعدين وانا بعوم خطبت دماغى ف حرف الكيكه ققرت انى اعمل ثورة ضد الكيك

رحت لماما وانا عاملة زى الاسد الشجاع كدة وقبل مااكلمها نسيت انا عايزة اقول ايه مشيت وبعدها بكام يوم ماما غيرت طريقة تقديم الكيك بدل ماتحط الصينية ع السفرة وكل واحد ياخد قطعتها وحتها ف اطباق بس المصيبة انها كيك برضة وانا كنت اتخنقت .

اللى كان مضايقنى ف الموضوع اننا بنفطر كيك وشاى بلبن طول الاسبوع لما بابا يبقى اجازة من الشغل نفطر اى حاجة تانية وكنت بتضايق واسكت وف يوم حلمت نفس الحلم ان بعوم جوه الكيك الكبيرة بس المرة دى بقى وقعت منها يعنى حرفها اتكسر وانا اتعورت بس برضه ماكنتش عارفة اتكلم خالص بذمتكوا اقول ايه انا زهقت من الكيك ؟؟؟ بصراحة كدة كانت حاجة بايجة اوى وكانت بالنسبة ليا عيب اقول كدة

وبعدها بكام يوم جى ضيوف عندنا وانا قولت الكيك هايخلص بقى لاقيت لماما قدمتلهم لب وسوادنى وحاجات حلوة كنا علطول بنشتريها من تنزانيا زى الجاكو وحاجات تانية قولت بقى اشمعنى دول يعنى هوا احنا بس اللى بناكل الكيك ده هوا الكيد بصراحة كان حلو بس كل يوم وانا كنت زهقت ......

هيا الناس التانية مش بتاكل كيك ليه رينا كدة وبعدها بفترة اتعرفت ع واحدة مصرية وعرفتها طريقة عمل الBALL CAKEبس المصيبة انها كيك برضه وانا مش راضيه اتكلم وف يوم صحينا من النوم ولاقينا ماما عامله بيض مسلوق وجبنة وشاى بلبن طبعا انا فرحت ونسيت الثورة اللى كانت لازم تتعمل ضد الكيك ....

ونهاية الحكاية انى لحد دلوقتى مش بعرف اعمل كيك وطبعا انا دلوقتى متجهة ناحية البسبوسه وده احسن برضه كيك ايه وطبعا الكلام ده بما لا يخالف شرع الله ...

وياثورة ماتمت :)

واتمسوا بالخير

الخميس، 8 مارس، 2012

اول مرة تحقيق

طبعا اول مرة ف حياتى اتحول للتحقيق ف الشغل من اول ما اشتغلت وكالعادة الناس كلها بتقف مع بعض عليك مش لانك عبيط ولا حتى مش عاجبهم الحكايه عشان يأمنوا نفسهم من الهوا الطاير .

الموضوع باختصار انى بشتغل سكرتيرة نائب رئيس مجلس الادارة ف شركة اول ما دخلت الشركة الكل تعب نفسيا وف الاخر اتأقلمنا كلنا بعد كدة رئيس مجلس الادارة قال انه هيشترى 2 سكانر جديدة من النوع الحديث سعر الجهاز 10.000 جنيه وبعد ما اتركب الجهاز عندى انا طبعا مضيت عليه انه عهده عندى انا والسكرتيرة (منار).

وطبعا بما لا يخالف شرع الله انا كنت هبلة ع الاخر يعنى مش فارقة معايا من اللى يستخدم الجهاز ده حتى الباسوورد كان معاها عشان تعرف تفتح الكمبيوتر بتاعى .

المهم اتستحبت حاجة (ورقة نتيجة 2012 ) طبعا بطريقة غلط وانا ماكنتش على مكتبى ولما رجعت لاقيت النتيجة مسحوبة وكالعادة ماهتميتش بالموضوع ما دام الاسكانر شغال وزى الفل بس عرفت ان النتيجة اتسحبت على سبيل التجربة .

المهم بعد الموضوع ده باسبوعين جهاز الاسكانر مارديش يسحب وعمل عصيان طلبت مهندس ال (IT)اللى هوا الطرف الثالث وقولتله الجهاز مش راضى يسحب المهم عرفنا ان الجهاز عطل اتصلنا بالشركة اللى اشترينا منها الجهاز والجهاز طبعا لسه ف الضمان وطلبنا ان الجهاز يرجع الشركة عشان يتصلح بعدها ب3 ايام تقريبا الشركة اتصلت وقالت ان الجهاز عطل بسبب نتيجة اتسبحت من عليه وانا افتكرت الموضوع ده وقلت انى كنت ف مكتب المدير التنفيذى بخلص شغل ولما رجعت عرفت ان النتيجة دى اتسحبت من الاسكانر

طبعا الحوار كله اتقلب عليا انا لوحدى والكائن الى اسمه (منار )قالت انا اول مرة اسمع ااموضوع ده وده موضوع تانى خالص ومريم بتخرج بينا من الموضوع هوا كده يابنى ادمين يخرج بيهم من الموضوع قشطة يالوزة .......
المستشار القانونى قال مريم ومنار وباسم اللى هوا مهندس ال (IT)يتحولوا للتحقيق طبعا منار وباسم قالوا ماشى بس مريم هيا اللى غلطانة مش احنا طبعا وش كدة ....والبسى يلمريم ف الحيطة

بس مريم قررت تفوق عشان ماتلبسش ف الحيطة لانها مش كبش الفدا بتاعهم واللى غلط بتحاسب .
واليكم نص التحقيق -

س:اسمك وسنك ووظيفتك وعنوانك ؟؟؟
ج:اسمى :مريم محمد فكرى محمد 27 سنة سكرتيرة نائب رئيس مجلس الادارة واعمل بالمرتبات الشهريه للعاملين بالادارة واقيم بالقاهرة الجديدة التجمع الاول المجاورة العاشرة فيلا (5).

س :ما هى اقوالك فيما هو منسب اليكى من من اتهامات بتلف الاسكانر ؟؟؟
ج : انا برئيه ياعم الحاج الموضوع انى مش انا اللى سحبت الورقة دى وانا كنت ف مكتب المدير التنفيذى ولما رجعت لاقيت الورقة دى مسحوبة ولما سالت منار قالتلى ايوه احنا سحبناها .

س : الجهاز ده عهده مين ؟؟
ج:طبعا الجهاز عهدتى انا /مريم فكرى ومنار حسن
طبعا المحامى راح سال منار قالها هوا الجهاز عهده مين قالتله الجهاز عهدتى انا ومريم بس مريم هيا اللى بتشتغل على الاسكانر لوحدها وده طبعا على اساس انى مولوده بالخبرة وبعرف اشتغل على الجهاز والنيعمة انا ذكية يانهار ابيض ده انا خسارة ف البلد دى :))

س:ما هو قولك فيما هو منسوب اليكى من احداث تلفيات بجهاز الاسكانر عهدتك ؟
ج:انا ماعملتش اى تلفيات وانا متعودة اسحب عليه ورق لوجو خاص بالشركة او ورق A4

س:ما قولك انه بعد مراجعة أ/باسم بانه لا يعمل على الجهاز بعد ان قام بتعليمك عليه ؟
ج :الكلام ده غير صحيح وهوا بيشتغل عليه وقام بسحب صورة لاحد العاملين بالشركة وهو بيعرف ف الاوبشن اكتر منى

س:هل كان يعلمك سحب الصورة لا كان بيعملها كعمل له ؟
ج : لا هوا كان بيجرب سحبها لاننى لم استطيع سحبها

س: هل قمتى بسحب ورقة النتيجة محدثة التلفيات بالجهاز ؟
ج:لم افم بسحبها مطلقا

س:من احدث التلفيات بالجهاز عهدتك ؟
ج:انا كنت بمكتب المدير التنفيذى واقم اقم بسحب الورقة وسالت منار عندما رايت الورقة على جهاز الكمبيوتر فردت بانهم سحبوها

س:هل تتهمى منار بسحب الورقة على الاكسانر محدثة التلفيات ؟
ج:لا مش منار لوحدها انا اتهم باسك ايضا

س:هل تتهمى باسم باحداث التلف بالاسكانر ؟؟
ج:لا الورقة قد تم سحبها على سبيل التجربة

س:ما قولك فيما ذكره باسم ومنار بانهم لا يعلموا شئ عن هذه الورقة ؟؟
ج:وانا ايضا لا اعلم حدوث تلف بالجهاز الا بعد فترة لكننى لم ادقق ف الموضوع لان الجهاز كان يعمل وقتها

س:هل توجد خلافات بينك وبين منار وباسم ؟؟
ج:لا توجد اى خلافات

س:هل لديك اقوال اخرى ؟؟
ج:ايوة منار بتعرف تتعمل الاسكانر ومعها الباسوورد بتاع الكمبيوتر بتاعى واستعملت الجهاز سابقا وقد رايتها وحين سألتها قالت انا فتحت الجهاز وبيتى بيتك يابوحه وضحكت