الثلاثاء، 16 يوليو، 2013


عوايدنا
فيه عادات وتقاليد ف حياتنا اتولدنا لاقيناها وعايشين بيها بس فى الحقيقة احنا قافشين عليها ... مسخرة.
ومن المساخر دى سن الجواز اللى ياحرام لو جارتك او صاحبه مامتك جت عندكوا ف البيت وخبطتك السؤال الشهير "انتى عندك كام سنه " ولما تردى عليها من واجب الذوق والادب طبعا وتقولك " ولسه ماتجوزتيش؟" او "ربنا يطمنا عليكى" طبعا الكلام مافيهوش حاجة وجميل جدا من الجوهر بس ..بس هوا اصلا يفقع المرارة ويخليكى تضربى نفسك مليون جزمة او اى حاجة قدامك وياسلام لو كانت سكينة O-o وده كله عشان عبرتيها اصلا !! الكلام اللى فات لو انتى بنت بس لو انت ولد بئى الموضوع بياخد ابعاد تانية خاااالص ابسط بُعد فيها انك يا شايفلك شوفة يا بتعُط عط السنين ;)
عارفين كل دا كوم و ان الطعنة تيجى من اقرب الناس ليك دا كوم تانى ، الأم والأب ؛مامتك حاطة ف اعتبارها انك ياحرام متاخرة ف الجواز عشان عديتى 23 او 24 سنة ومفيش جواز ده عشان لما اتجوزت من حوالى ربع قرن كان عندها 20 سنة بالكتير اوى وباباكى هيموت من القلق وعايز يفرح بيكى وده من حقهم طبعا بس محدش فيهم او ف غيرهم حاطط ف اعتباره ان الزمن اتغير وسن الجواز اتاخر و ان طريقة الجواز اصلا اتغيرت!!
زمان الجواز كان ف منتهى السهولة وده لان الناس كانت بتجوز جواز قرايب "الواد لبنت عمه " يا جواز معارف " محمد يتجوز بنت الجيران" اللى طالعين نازلين مع بعض واللى نعرفه احسن من اللى منعرفوش
لكن دلوقتى مع تعقيد الحياة كل حاجة اتغيرت بما فيها طرق الجواز دلوقتى بقى الولد او البنت لازم يحطوا بعض تحت اختبارات ديناميكية ولوغارتيمات صعبة عشان البنت تتاكد ان الولد بيحبها او الولد يتاكد من اخلاق البنت وطبعا تيجى المشكلة القاتلة بعد كدة ان الام او الاب ممكن يرفضوا الجوازة لاى سبب واللى غالبا بيبقى مش مقنع ويفقع المرارة زى " انا اللى لازم اختار العروسة" طب وانا ايه يعنى ؟ رجل كرسى مثلا ؟
وهوب تلاقى الام اتحولت لخاطبة ومنظار ف نفس ذات الوقت وتقعد تدور وتتفحص وتتمحص ف البنات او الولاد اللى حواليها
ياحاجة ده لو انتى اخترتى ولا مؤاخذة (شراب) ابنك او بنتك هيلبسوه وهما متضايقين ونسيتى انهم بقالهم اكتر من 8 او 9 سنين بينزلوا يشتروا حاجاتهم وهدومهم لوحدهم وعشان ابنك او بنتك بقوا عبارة عن "شحط كبير" وعندهم ذوق ووجهة نظر فما بالك بقى بالعروسة اللى انتى اختريتها وقال ايه عايزاه يوافق عليها بالصلاة ع النبى ومش عشان "هيا عروسة وزى القمر وم العيلة ونقاوة ايدى " يبقى لازم يوافق عليها وعشان بأختصار "هيا دى الانسانه او الخلقة اللى هيعيش باقى عمره معاها " ده لو ربنا اداله الصحه يعنى .
الجواز بيتقلب من رغبة لفرض يعنى انا كبرت يبقى لازم اتجوز ومش عارفة مين صاحب جارنا بيدور على عروسة فيجى بيص ويتفرج ولازم انا اكون حلوة ومطيعة ف القعدة ده غير التحضيرات اللى الوالدة بتعملها معايا يعنى اقعدى كدة واتكلمى بالطريقة الفلانية وابتسمى ابتسامة رقيقة ولو سالك عن الشغل تكون الاجابة " طبعا هسيبه" ولازم اسمع الكلام وانفذه :D مش قولتلكو من الاول مسخرة
بنات كتير جدا اتحطت تحت ضغوط بسبب حاجات زى كدة ومش بنات بس لا رجالة كمان ومنهم ناس انا اعرفهم وطبعا هما عارفين نفسهم كويس .
للاسف الكلام ده كله بيحصل ف كل بيت مصرى ، سيبوكوا منهم بدل ما تلاقوا نفسكم راجعين بعد شهرين تلاتة منورين جنب امكم عشان نتجوز بدرى سنتين تلاتة اختاروا صح من غير استعجال و ضغوط عشان خاطر ترتاحوا على الاقل الكام السنة اللى بعد الجواز واخيرا ده جواز ياردالة مش فستان ف فاترينة xDواتمسوا بالخير 